NOORD-KAAP. – Die droogte wat tans oor Suid-Afrika heers, is ’n stryd vir almal. Hoe is dit moontlik om gedurende so ’n uitmergelende droogte jou kop in die lug te hou?
Droogte nie maklik nie
Wat dryf en motiveer jou om aan te gaan en vorentoe te kyk? P.G Jansen, ’n boer buite Kimberley, sê dat die droogte nie vir hom maklik is nie. Hy sê hy bly op sy knieë en hoop en vertrou dat die Here ’n uitkoms sal gee. Andries Burger wat buite Ulco boer, sê dat dit vir hom moeilik is om die regte woorde te kry om die droogte te beskryf.
Fokus op die klein goed
Jaco du Toit boer buite Kimberley op die plaas Uitkyk. Christenskap is vir hom baie belangrik in hierdie droogte. “My familie en die mense rondom my is baie ondersteunend en dit help baie.”Hy voeg by dat mens moet fokus op die klein goedjies wat nogsteeds boerdery die moeite werd maak – “Daar is altyd iets mooi daaragter.” Hy sê dat ’n liefde vir boerdery die droogte vir hom makliker maak.
