KIMBERLEY – Inwoners in Herlear in Kimberley het genoeg gehad van ’n alarm by ’n huis in die buurt wat deur die dag en nag skreeu.
Dit kom ná verskeie inwoners op sosiale media gekla het.
’n Inwoner wat die alarm opgeneem het, sê hulle hoor dit ontydig sedert verlede week. Hy het die tye vasgestel – dit blêr 24 uur vir twee minute aan met twee minute van stilte voor dit weer begin, sê hy.
Volgens ’n boodskap in ’n gemeenskapsgroep op WhatsApp is die eienaar van die huis opgespoor, maar sy is na bewering uitstedig en kon nie onmiddellik iets daaraan doen nie.
