KIMBERLEY – Die matrieks se punte kom al vroeg in Januarie uit. Enigiemand wat nou al daar deur is, weet dat hierdie ’n stresvolle situasie kan wees.
Vir Chané Williams van Hoërskool Diamantveld het haar laaste eksamen nie baie verskil van die voriges nie. “Dit het verbygevlieg.” Sy gaan rustig vakansie hou en nie bekommerd wees oor haar resultate nie. “Ek voel heel postitief, want om nou senuweeagtig te wees, gaan niks kan verander aan die punte nie.”
GF van Zyl voel dat dit redelik goed gegaan het. Hy voel ook nie senuweeagtig nie. “Dis maar net hoe goed die punte gaan lyk wat my laat stres.”
“Ek voel heel goed oor my punte wat gaan kom,” sê Elbe Oosthuizen. Behalwe dat die vraestel twee van wiskunde vir haar uitdagend was, was die res vir haar beter as die rekord-eksamen. Sy sien uit na haar vakansie en gaan dit ten volle geniet.
Silje Fredericks van Hoërskool Noord-Kaap sê dat sy tydens die eksamen senuweeagtig was, “maar nou dat dit verby is is ek nie meer so bekommerd nie.” Sy kies om nou op sy vakansie te fokus – sy sal volgende jaar weer aan haar vakansie dink.
