Andrew Louw, DA-premierskandidaat van die Noord-Kaap, het tydens die bekendstelling van die sewe nuwe wyksraadslidkandidate gesê dat daar nie werklik ’n waterkrisis bestaan nie.
“Elke keer voor ’n verkiesing duik daar ’n waterkrisis op. Kom ek vertel julle hoekom is daar ’n waterkrisis. Die ANC het geld nodig en gebruik Sol Plaatje-munisipaliteit. Die ANC wil die verkrygingsprosedures omseil. Dit is waarom hulle die krisis opgemaak het. Daar is geen waterkrisis nie,” verduidelik Louw.
Louw sê: “Ons gaan môre self daarna toe gaan en ondersoek instel. Ons gaan die water toets om te sien of wat hulle gesê het oor die waterkrisis waar is.”
Christiaan Cloete, ’n joernalis van Noord-Kaap-koerant het Louw gevra hoe hy weet dat die waterkrisis opgemaak is. Louw het geantwoord: “Ek het ’n patroon gesien. In 2014 en 2016 was daar ’n waterkrisis. Kamvers-dam was opgeknap teen ’n koste wat in die miljoene beloop het. Hoekom sit ons vandag nog met hierdie krisis, toevallig weer voor ’n verkiesing?”
