BARKLY-WES. – ’n Man (34) is Vrydagoggend in hegtenis geneem nadat 140 kg koper, vermoedelik gesteel, in sy besit gevind is.
Brig. Mohale Ramatseba, polisiewoordvoerder, sê die polisie het ’n voertuigkontrolepunt (vehicle check point) hier gehou. “Die polisie het omstreeks 10:00 ’n wit Isuzu-bakkie deursoek wat van Kuruman na Kimberley onderweg was en het 140 kg koper in die bakkie gevind.”
Hy sê die 34-jarige man is in hegtenis geneem vir die besit van vermoedelik gesteelde goedere.
“Die geskatte straatwaarde vir hierdie koper is sowat R7 500. Die polisie het ook die bakkie gekonfiskeer omdat dit glo in die pleeg van die misdaad gebruik is.”
Die verdagte sal binnekort in die Barkly-Wes-landdroshof verskyn. Die ondersoek duur voort.
