Patrick Mabilo, uitvoerende burgemeester van Kimberley, het vanoggend met streng voorwaardes nuwe lede op die burgemeesterskomitee vir Sol Plaatje-munisipaliteit aangewys.
Mabilo het tydens die vergadering gesê: “Ons benodig dat korporatiewe dienste aggressief aan die werk spring om R148 miljoen se uitstaande skuld in te vorder. Ons kontantvloei is power, maar sal verbeter word deur betalende gemeenskapslede. Maar ons vra ook vir Kimberley besighede om tot die tafel te kom.”
“Onwettige informele nedersettings sal ontmoedig word. Mense moenie pondokke onwettig opslaan nie. ’n Omvattende program gaan binnekort geloods word om kwessies rondom behuising aan te spreek. Onthou wanneer jy onwettig ’n pondok oprig, is daar nie voorsiening vir water, sanitasie of elektrisiteit nie, omdat dit nie deel is van die munisipaliteit se beplanning nie. Die bou van huise sal aangemoedig word,” verduidelik Mabilo.
