Avon Suid-Afrika sê hulle ondersteun ’n petisie om die omstrede ‘Rape Day’-rekenaarspeletjie, wat onder andere die verkragting van vroue uitbeeld, in Suid-Afrika te verban.
Die petisie wat op 21 Maart deur 1000 Woman Trust geloods is, wil alle videospeletjies wat geweld op vroue uitbeeld in Suid-Afrika verban. Katlego Modipane, ’n woordvoerder by Avon sê: “Ons kan eenvoudig nie toekyk, terwyl platforms misbruik word om geweld op vroue uit te beeld en te verheerlik nie. As verantwoordelik burgers is ons, by Avon, vasbeslote om vroue te beskerm.”
Voorts sê hy: “1000 Woman Trust werk onverpoos om lig te werp op die geweld teen vroue. Ons ondersteun die petisie ten volle.” Intussen het Steam, ‘n rekenaarspeletjie-platform wat deur die rekenaar-speletjie uitgewer, Valve, besit word, het op 6 Maart aangekondig hulle gaan nie ‘Rape Day’ op hulle platform vrystel nie.
“Nadat ons die feite oorweeg en bespreek het, het ons gevoel die speletjie hou ’n onbepaalde risiko in. Ons het daarom besluit om nie die speletjie op Steam beskikbaar te stel nie,” het die uitgewer in ‘n persverklaring gesê.
