Noord-Kaap – ‘n Vyftienjarige seun en ‘n 24-jarige man is op Prieska deur lede van die eenheid vir gesinsgeweld, kinderbeskerming en seksuele misdrywe (GKS) in hegtenis geneem. Dit volg na aanleiding van die beweerde verkragting en moord op ‘n vrou in haar vroeë 30’s. Luidens ‘n polisieverklaring het die slagoffer huis toe geloop en die verdagtes het haar voorgekeer en na ‘n nabygeleë tuin gesleep. Hulle het glo beurte gemaak om haar te verkrag. ‘n Verbyganger het die slagoffer hulpeloos en halfnaak gevind.
Volgens die polisie was sy aangerand. Alhoewel sy mediese hulp ontvang het, het sy aan haar beserings beswyk. Die verdagtes is in hegtenis geneem nadat die polisie leidrade opgevolg het. Die verdagtes sal na verwagting môre op ‘n aanklag van verkragting en moord in die Prieska-landdroshof verskyn.
