VRYSTAAT. – Vier tronkbewaarders van die Mangaung-korrektiewe fasiliteit in Bloemfontein is in hegtenis geneem in verband met die beweerde moord op ‘n gevangene, Mpho Mkhumbeni (37).
Volgens vroeëre berigte deur Nuusflits is daar ’n dag voor Mkhumbeni se dood ’n deursoeking van selle gedoen, glo in verband met ’n rugsak met geld wat vermis is. Die oorledene was glo een van die gevangenes wie se sel deursoek is, en daar word vermoed dat hierdie gebeure aan mekaar gekoppel is.
Brig. Motantsi Makhele het bevestig dat Mkhumbeni se afsterwe op 12 Maart vanjaar aangemeld is. Aanvanklik is ’n geregtelike doodsondersoek geopen weens die vermoede dat hy aan natuurlike oorsake gesterf het. ’n Nadoodse ondersoek het egter later aan die lig gebring dat Mkhumbeni aan onnatuurlike oorsake dood is, wat daartoe gelei het dat die saak na ’n moordondersoek verander is.
Die Bloemspruit-polisie se verdere ondersoek het Dinsdag tot die arrestasie van vier tronkbewaarders gelei. Die verdagtes, tussen 34 en 50 jaar, is op aanklag van moord in hegtenis geneem. Hulle sal vandag, 23 April, in die Bloemfontein-landdroshof verskyn.
Lees meer oor die insident hier onder:
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
