KWAZULU-NATAL. – 15 mense is beseer, van wie twee kritiek, nadat ’n bakkie wat verskeie passasiers vervoer het, vroeër vandag verskeie kere op die R69 buite Vryheid omgeslaan het.
Craig Botha van KwaZulu Private Ambulance Service sê paramedici is na die ongeluk naby die Adora-winkel ontbied. Die bakkie was onderweg van Vryheid na Louwsburg toe die bestuurder na bewering beheer verloor het en die voertuig verskeie kere omgeslaan het. Twee van die beseerdes het kritieke beserings, onder meer aan die kop en buik, opgedoen. Nog vyf mense het ernstige beserings, waaronder frakture, opgedoen, terwyl agt ander ligte beserings soos snye en kneusplekke opgedoen het. Beseerdes is op die toneel behandel voordat hulle vir verdere mediese sorg na ’n hospitaal vervoer is.
Die polisie was op die toneel om verkeer te beheer, met een baan wat tydelik gesluit was. Die oorsaak van die ongeluk word deur die polisie ondersoek.
