LIMPOPO. – ’n 65-sitplek bus is Dinsdag op die N1 naby die Peter Mokaba-stadion onderskep, nadat beamptes opgemerk het dat dit oorlaai was. Die bus met 117 passasiers was van Gauteng na Malawi onderweg met 52 meer passasiers as die wettige toelaatbare kapasiteit.
In ‘n plasing op sosiale media sê die provinsiale departement van vervoer en gemeenskapsveiligheid die bus het ‘n bestuurder, 101 volwassenes en 15 minderjariges vervoer. Die voertuig is van die Polokwane-weegbrug na die provinsiale verkeersbeheersentrum (PTCC) herlei. Alhoewel die bestuurder probeer weghardloop het, is hy vinnig deur die polisie en verkeersbeamptes gekeer en in hegtenis geneem.
Die bus is by die verkeersbeheersentrum gehou totdat die oorbodige passasiers verwyder is en ‘n boete betaal is. Verdere ondersoeke is aan die gang. Verkeersbeamptes is vir hulle toewyding geprys en hulle is aangemoedig om aan te hou om ongelukke te verminder.
