VK. – ’n Polisiebeampte is summier afgedank nadat sy ’n fotoraam gebruik het om haar skootrekenaar se sleutels af te druk en só die vals indruk te skep dat sy van die huis af werk.
Volgens Sky News het die Avon- and Somerset-polisie gesê die beampte, slegs as “Sergeant X” geïdentifiseer, het dié metode gedurende die meeste van haar skofte in April en Mei verlede jaar gebruik. Sy het erken dat sy ’n hoek van ’n raam op haar sleutelbord geplaas het om te keer dat die skootrekenaar in slaapmodus gaan tydens ’n tydperk van persoonlike uitdagings.
’n Ondersoek is van stapel gestuur nadat data van die mag se professionele-standaarde-afdeling getoon het dat haar toetsaanslae beduidend hoër as normaal was. Verdere bewyse het aangedui dat die aantal toetsaanslae tussen drie en agt keer hoër was as dié van kollegas in soortgelyke poste.
Sergeant X is summier ná ’n tugverhoor ontslaan sonder kennisgewing en verbied om weer by die polisie of enige ander wetstoepassingsagentskap te werk, nadat bevind is dat haar optrede op growwe wangedrag neerkom.
Bronne: Sky News, The Independent
