WES-KAAP. – Ian Cameron, die voorsitter van die parlement se portefeuljekomitee oor polisie, sê onaangekondigde toesigbesoeke in die Kaapse metropool het weer gewys dat die polisie weens ernstige tekorte aan hulpbronne in baie gebiede sukkel om effektief te funksioneer.
Volgens Cameron word polisiebeamptes daagliks in hoërisikogebiede ontplooi sonder voldoende voertuie en toerusting, wat beide misdaadvoorkoming en ondersoeke belemmer. Hy sê dit is ’n patroon wat landwyd herhaal word. By die Khayelitsha-polisiekantoor het hy gevind dat 15 van die 38 voertuie tans in werkswinkels is – dit is bykans 40% van die voertuigvloot. Dit, sê hy, plaas groot druk op die stasie se vermoë om vinnig op misdaad te reageer. Hy het ook kommer uitgespreek oor die lang wagtye vir herstelwerk, met sommige voertuie wat maande lank buite diens is weens meganiese en skadeherstelwerk.
Verder het Cameron gewys op ernstige onderbemanning by die Khayelitsha se eenheid vir gesinsgeweld, kinderbeskerming en seksuele misdade. Die eenheid het slegs 21 lede, terwyl 43 as ideaal beskou word, wat ’n tekort van sowat 22 mense beteken.
Hy sê die gebrek aan voertuie en personeel het ’n direkte impak op beamptes se werk en dra by tot ‘n lae moraal. Cameron het intussen die polsie se bestuur skriftelik versoek om dringend in te gryp en oplossings te vind.
Druk hier om meer te lees.
