VRYSTAAT. – Twee verdagtes is in hegtenis geneem nadat polisiebeamptes wat van diens af was, ’n vragmotor met vermoedelik gesteelde koperkabels ter waarde van meer as R1,8 miljoen op die N1 onderskep het.
Volgens polisiewoordvoerder, lt.kol. Thabo Covane, het lede van die Fezile Dabi-distrik se infrastruktuurtaakspan, wat op hul rusdae was, Woensdagaand omstreeks 19:00 inligting ontvang oor ’n vragmotor wat reeds koperkabels in Welkom gelaai het en op pad was om nog by ’n skrootwerf in Kroonstad op te laai. Die span het vinnig opgetree en die voertuig op die N1 in die rigting van Gauteng opgespoor. Die vragmotor is kort ná die Vaal-tolhek tot stilstand gebring, waar ’n aanvanklike deursoeking getoon het dat een van die houers sakke vol koperkabels bevat. Twee insittendes plus die voertuig is vir verdere ondersoek na die Sasolburg-polisiestasie geneem. Daar het beamptes ontdek dat nog koperkabels in ’n tweede houer versteek was onder sakke met fyngedrukte aluminiumblikkies.
Twee mans, onderskeidelik 27 en 59 jaar oud, is op die toneel in hegtenis geneem. Hulle staan tereg op aanklagte van onder meer sabotasie en beskadiging van noodsaaklike infrastruktuur, asook die besit van vermoedelik gesteelde eiendom en koperkabels.
Die verdagtes sal binnekort in die landdroshof in Parys verskyn.
