VSA. – TikTok het ingestem om $400 miljoen aan die Amerikaanse regering te betaal om ‘n regsgeding te skik waarin beweer word dat die platform kinders se privaatheid geskend het. Dit is een van die grootste skikkings ooit oor die kwessie.
Volgens AP News spruit die ooreenkoms voort uit ‘n regsgeding wat die Amerikaanse Departement van Justisie in 2024 onder die voormalige president Joe Biden aanhangig gemaak het. Daarin is beweer dat TikTok en sy moedermaatskappy, ByteDance, “groot hoeveelhede data” oor miljoene gebruikers jonger as 13 jaar ingesamel het.
Dit was in stryd met die Children’s Online Privacy Protection Act (COPPA), ‘n federale wet wat in 2000 ingestel is. Dit is dieselfde wet waaroor tientalle Amerikaanse state tans ook vir Meta dagvaar.
“Kinders en ouers word vandag beter beskerm as toe hierdie saak begin het,” het die assistent-prokureur-generaal Brett Shumate gesê.
Bronne: Amerikaanse Departement van Justisie, AP News
