KWAZULU-NATAL. – ’n Man is dood en ’n tweede liggaam is later uit ’n rivier in Canelands gehaal, nadat ’n voertuig Sondagoggend tydens ‘n jaagtog met die metropolisie in die water beland het.
Reaction Unit South Africa (Rusa) sê in ‘n sosialemediaplasing ‘n silwerkleurige Hyundai Getz, met drie insittendes, is glo deur die metropolisie gejaag toe dit omstreeks 10:30 in New Glasgowweg van die brug af gery het en op sy dak in die rivier beland het. Die jaagtog het na bewering begin nadat beamptes probeer het om die voertuig op die R102 naby die Canelands-verkeersligte tot stilstand te bring. Die bestuurder het glo nie gehoor gegee nie.
Volgens getuies is ‘n vroulike insittende uit die voertuig geslinger en met ernstige beserings op die rivieroewer aangetref. Lede van die gemeenskap het die voertuig omgedop en ’n manlike passasier uit die voorste sitplek gehaal. Hy is op die toneel dood verklaar. Daar is later bevestig dat hy ’n tradisionele geneser en die vrou se eggenoot was.
Die bestuurder is aanvanklik as vermis aangedui. Metropolisie en Ethekwini se brand-en-reddingsdienste, asook ’n privaat ambulansdiens, het die rivier deursoek en sy liggaam is later uit die water gehaal.
Die beseerde vrou is op die toneel gestabiliseer en per ambulans na ’n hospitaal vervoer.
