GAUTENG. – ‘n Piper Cherokee 140-vliegtuig (registrasie ZS‑XPR) was vandag (Woensdag) in ‘n vliegongeluk in Midrand betrokke. Twee persone het ernstige beserings opgedoen. Die toneel is steeds aktief.
Volgens ‘n verklaring van Sisa Majola, burgerlugvaartowerheid-woordvoerder, het ‘n vlieginstrukteur en leerlingvlieënier tydens ’n opleidingsvlug vanaf Grand Central-lughawe ‘n ongeluk in ’n gebied naby Midrand gehad. Albei het ernstige beserings opgedoen en is na ’n hospitaal vervoer. Die vliegtuig het groot skade opgedoen.
Die afdeling vir ongelukke en voorvalondersoeke (AIID) is tans besig met ’n ondersoek op die toneel. ‘n Voorlopige verslag oor die ongeluk word binne 30 dae verwag.
