OOS-KAAP – Tussen April en Julie verlede jaar is 4 869 geboortes van swanger meisies onder 20 jaar in openbare hospitale in die Oos-Kaap aangeteken. Van hierdie meisies is 117 tussen 10 en 14 jaar en 4 752 tussen 15 en 19 jaar. Hierdie syfers dui op ’n ernstige versuim om kinders te beskerm en ’n toenemende noodsituasie deur geslagsgebaseerde geweld.
Marlene Ewers, MPL en DA Skadu-LUR vir maatskaplike ontwikkeling, sê wanneer kinders gedwing word om ‘n ma te word, is die gevolge katastrofies. Meisies ervaar trauma, ontwrigte opvoeding, langtermyn gesondheidsrisiko’s en intense vrees. Swangerskappe word dikwels weggesteek weens stigma, geweld of ’n gebrek aan volwassenes se ondersteuning. Wanneer die ma nog self ‘n kind is, kan desperaatheid en isolasie lei tot onveilige uitkomste vir babas, insluitend verwaarlosing of dat die baba weggegooi word.
Ewers sê dat kinderswangerskap, baba-verlating en geslagsgebaseerde geweld onafskeidbare simptome van dieselfde gebroke stelsel is. Die DA ondersteun praktiese en menslike ingrypings wat beide kwesbare moeders en babas beskerm, insluitend veilige en wettige opsies om ’n baba sonder vrees, stigma of kriminele vervolging af te staan.
