KWAZULU-NATAL. – Vier familielede is Maandag kort ná 14:30 tydens ’n honde-aanval in Deeside-weg in die Bonela-gebied van Durban beseer. ‘n Ma en seun is kritiek beseer.
Garrith Jamieson van ALS Paramedics sê met aankoms op die toneel is ’n gemengderas-hond in die huis aangetref, met bloed oral in die woning. Volgens rapportering het die familiehond vier inwoners aangeval. ’n Ma en haar seun is in ’n kritieke toestand na ’n nabygeleë hospitaal vervoer, nog voordat paramedici op die toneel was. Twee ander familielede het geringe beserings aan hul onderbene opgedoen en is op die toneel behandel. Hulle het verdere mediese behandeling geweier.
Volgens ALS Paramedics is die omstandighede wat tot die aanval gelei het, tans onbekend, maar alle toepaslike owerhede was op die toneel.
