LIMPOPO. – Meriam Tutje (27) het haar eks-kêrel se huis in Villa Nora aan die brand gesteek omdat sy kwaad en jaloers was. Sy is vir die brandstigting gevonnis.
Kol. Malesela Ledwaba sê sers. George Lebudi van Villa Nora-speurtak se ondersoek het gelei tot die suksesvolle afhandeling en vonnis van die saak van brandstigting. Die brand het die slagoffer se huis en besittings ernstig beskadig, waarna Tutje deur die Lephalale-streekhof skuldig bevind is en tot sewe jaar direkte tronkstraf gevonnis is.
Lt.genl. Thembi Hadebe het Lebudi en die nasionale vervolgingsgesag geprys. Ledwaba het ook die gemeenskap aangemoedig om konflik vreedsaam op te los en by sielkundiges, pastore, die polisie, gemeenskapsleiers en maatskaplike werkers hulp te soek eerder as om hulle tot misdaad te wend.
