EDENVALE, GAUTENG. – ’n Man het verlede Donderdag ernstige brandwonde opgedoen toe hy glo kragdrade wou steel. Volgens berigte het die voorval by ’n transformator in Karaglen plaasgevind.
Caxton News berig ’n ooggetuie het gesien hoe die brandende man in ’n parkeerterrein by Karaglen-winkelsentrum rondhardloop. Volgens die ooggetuie het die man om hulp geroep terwyl hy in vlamme gehul was.
Hy het na bewering in die parkeerterrein inmekaargesak. Nooddienste is na die toneel ontbied en hy is na ’n hospitaal geneem.
Kapt. Neldah Sekgobela, Ekurhuleni-SAPD se woordvoerder, sê die polisie is ook na die toneel ontbied en het ’n man met ernstige brandwonde aangetref wat na bewering kabels probeer opgrawe het.
Edenvale-SAPD het ’n ondersoek begin.
Bronne: SAPD, Caxton News, Edenvale News, Bedfordview News
