GAUTENG. – Altesaam sewe beweerde huisrowers, onwettige immigrante van Zimbabwe, is deur ‘n triotaakspan van Diepsloot in Ivory Park, vasgetrek. Hulle is vermoedelik betrokke by die skietdood van ‘n polisielid en ‘n gr. 12-leerder.
Kol. Noxolo Kweza sê die taakspan het inligting van die verdagtes, tussen 20 en 35 jaar, ontvang waarna ‘n span polisielede en metropolisielede sewe verdagtes in ‘n huis in Kaalfontein vasgetrek het. Twee ongelisensieerde vuurwapens en ammunisie is in hulle besit gevind.
Kweza sê die verdagtes is suksesvol aan ‘n huisroof in Februarie in uitbreiding 13 verbind. Die taakspan glo die verdagtes het die Diepsloot-gemeenskap geterroriseer.
Ondersoek word gedoen om die verdagtes met nog sake van moord, poging tot moord en rooftogte waartydens ‘n polisielid geskiet en ‘n gr. 12-leerder van die Gekombineerde Skool Diepsloot geskiet is, te verbind.
Die verdgtes het op aanklagte van huisroof, die besit van ongelisensieerde vuurwapens en ammunisie en oortreding van die immigrasiewet in die Randburg-landdroshof verskyn.
