VRYSTAAT. – Die polisie op Bandfort het ‘n geregtelike doodsondersoek geregistreer nadat ‘n seun (10) glo op 8 Mei omstreeks 16:00 aan die hand van ‘n seun (9) in Nomzamo Park, Majwemasweu gesterf het.
Kapt. Stephen Thakeng sê die gr. 4-leerders was van afsonderlike skole op pad huis toe toe daar na bewering ‘n bakleiery tussen die twee uitgebreek het. Die jonger seun het glo ‘n mes by sy ouerhuis daar naby gaan haal en die 10-jarige gesteek.
Die polisie is na die toneel ontbied, waar die 10-jarige in sy skoolklere in ‘n ambulans met ‘n steekwond in sy bors gelê het. Paramedici het die vlekrye staalmes, met ‘n swart handvatsel, op die grond uitgewys. Die seun in die ambulans is dood verklaar. Hy is deur sy ma geïdentifiseer.
Thakeng sê die 9-jarige seun is terug in die sorg van sy ouers en maatskaplike werkers is betrokke.
