LIMPOPO. – ’n 36-jarige buitelandse man moes noodgedwonge Woensdagoggend in die plafon van ‘n huis wegkruip toe sowat 19 gewapende verdagtes by ’n huis in Mokgwathi Village ingebreek het.
Volgens polisiewoordvoerder, kol. Malesela Ledwaba, het die man omstreeks 03:30 wakker geword nadat hy harde geluide, gevolg deur geweerskote, by die hek en in die erf gehoor het. Die verdagtes het die huis se deur oopgedwing en sy kamer binnegegaan waar hulle ‘n onbekende bedrag geld en voertuigsleutels buit gemaak het. Hulle het daarna by nog 11 kamers ingebreek en ook daar onbekende bedrae geld gesteel. Die verdagtes het die man se Toyota Hilux, ter waarde van sowat R150 000, gesteel en die toneel in twee Toyota Quantum-minibusse en die wit bakkie verlaat.
’n Soektog na die sowat 19 manlike verdagtes is aan die gang. Enigiemand met inligting wat die ondersoek kan help, kan sers. Lily Ncwana by 079 722 9596 bel.
