LIMPOPO. – ‘n Verdagte is dood en nog een is Woensdag kort voor 17:00 gewond ná ‘n gewapende rooftog by ‘n groothandelaar in Ceres Village, in die Matlala-polisiëringsgebied, wat tot ’n skietery met die polisie gelei het.
Brig. Hlulani Mashaba, provinsiale polisiewoordvoerder, sê in ‘n verklaring aan Nuusflits twee mans het glo die winkel betree, waarna een ’n vuurwapen op die eienaar gerig het. Hulle het kontant uit die kasregister geneem, terwyl ’n derde verdagte buite in ’n blou Hyundai i20 gewag het.
In ‘n operasie ná die rooftog deur die polisie geloods, is die verdagtes naby Bloedrivier in die Seshego-polisiëringsgebied opgespoor. Toe die polisie probeer hulle voertuig te onderskep, het twee gewapende verdagtes uit die voertuig gespring en op die beamptes geskiet. Een verdagte is doodgeskiet en nog een gewond en onder polisiebewaking in ‘n hospitaal opgeneem. Die derde verdagte het gevlug en word gesoek. ’n Vuurwapen is op die toneel gevind.
Die polisie ondersoek sake van sakeroof, poging tot moord en die besit van ’n ongelisensieerde vuurwapen.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
