Let wel – inligting is bygevoeg
LIMPOPO. – At Mahne (77) het Saterdagaand sy lewe in ‘n plaasaanval in Baltimore verloor. Sy vrou Pietro is met beserings in die Ellisras-hospitaal opgeneem.
Luidens ‘n verklaring deur kol. Malesela Ledwaba het die Tolwe-polisiekantoor ‘n soektog na twee gewapende verdagtes geloods. Die bejaarde man het omstreeks 16:00 die plaashuis verlaat om sy beeste na te gaan. Terwyl hy buite was, het twee verdagte mans ongemerk by die plaashuis ingegaan en sy vrou oorrompel en vasgebind. Terug by die huis het die man op die aanvallers afgekom. Die verdagtes het hom met ’n mes geforseer om stil te bly, hom vasgebind en ernstig aangerand voordat hulle gevlug het. Die vrou kon hulp ontbied deur die plaaswag te waarsku.
Toe polisie en nabygeleë boere op die toneel opdaag, het hulle die bejaarde man steeds vasgebind en bewusteloos aangetref. Nooddienste het hom op die toneel dood verklaar. Die verdagtes het volgens die polisie met ’n vuurwapen, selfone en ’n onbekende bedrag kontant gevlug.
Enigiemand met relevante inligting oor die verdagtes kan speur.sers. Simon Ditle by 082 414 1882 bel. Die ondersoek duur voort.
Luidens ‘n verklaring van André Moss, VF Plus-LPW, sal aanhoudende druk uitgeoefen word, totdat die regering plaasaanvalle as ‘n prioriteitsmisdaad verklaar en daadwerklike optrede volg. Moss het sy afgryse oor die wrede aanval uitgespreek en medelye oorgedra. Die misdaad word tans ondersoek.
Gloudie van Rensburg het op Baltimore Advertising se sosialemediablad gesê: ‘n Groot boom in ons gemeenskap het onnodig geval. Oom At Mahne jy was ‘n Legend. Oom en Oom se familie verdien dit nie. Niemand verdien dit nie. Ons dra julle familie in ons gebede. Pietro Mahne, Chrisjan Mahne, Juanita Mahne, kleinkinders, Attie Mahne en gesin, en alle familie en vriende, sterkte in hierdie tyd. Almal wat daar was en betrokke was en steeds is, ons bedank julle. Mag julle vertroosting kry.
‘n Gesprek tussen Petrus Sitho en Anton Keet dui daarop dat Mahne doodgeslaan is. Die Mahne-kinders bly glo op ‘n buurplaas. Sitho het intussen die nuwe BVV-politieke party – Boere Vryheidsvegters – vir 2026 aangekondig.
Lees die volledige verklaring hier onder:
Die VF Plus spreek sy diepe afgryse uit oor die wrede plaasaanval wat gisteraand die Mahne-familie van Baltimore getref het.
Wat vir die meeste Suid-Afrikaners ’n tyd van vreugde en dankbaarheid behoort te wees, het vir hierdie familie in ’n oogwink verander in ’n nagmerrie wat geen boer en sy gesin ooit behoort te beleef nie.
Oom At Mahne het sy lewe tragies verloor en sy vrou, tannie Petro, is na die Ellisras-hospitaal gehaas.
Die presiese verloop van gebeure word nog ondersoek.
Die VF Plus spreek sy waardering uit teenoor Sakkie Louwrens van Bosveld Misdaad (BMO) en sy span vir hul onbaatsugtige diens en toewyding.
Hulle stel hulself telkens bloot aan die gruwelikste tonele om die waarheid te ontrafel en leidrade te bekom wat kan lei tot die vastrek van die aanvallers.
Die VF Plus veroordeel plaasaanvalle ten sterkste.
Hierdie misdade is nie blote statistiek nie, maar ’n direkte aanval op die land se voedselprodusente en op die veiligheid van landelike gemeenskappe.
Die VF Plus sal aanhou druk uitoefen totdat die regering plaasaanvalle as ’n prioriteitsmisdaad verklaar en daadwerklike optrede volg.
Die party betuig sy innige meegevoel aan die Mahne-familie en bid dat die Vader hulle in hierdie donker tyd sal dra en versterk.
– André Moss, VF Plus-LPW en provinsiale leier: Limpopo
Nuusflits het polisiekommentaar van kol. Malesela Ledwaba gevra.
