GAUTENG. – Die Suid-Afrikaanse regering het die ontplooiing van meer as 2 000 lede van die Suid-Afrikaanse nasionale weermag aangekondig, om saam met die polisie misdaad en georganiseerde misdaadnetwerke landwyd te bekamp.
Die ontplooiing is Sondag by die nasionale gesamentlike operasionele en intelligensiestruktuur (NatJoints) se koördinasiesentrum in Pretoria deur genl. Fannie Masemola, die nasionale polisiekommissaris, en Rudzani Maphwanya, die hoof van die nasionale weermag, verduidelik.
Die gesamentlike operasie, bekend as “Operation Prosper”, sal oor 13 maande plaasvind en fokus op misdaadbrandpunte in onder meer die Vrystaat, Gauteng, Noordwes, die Wes-Kaap en die Oos-Kaap. Die ontplooiing is daarop gemik om die polisie te ondersteun.
Dit volg op president Cyril Ramaphosa se opdrag tydens die staatsrede om die stryd teen georganiseerde misdaad te verskerp, samewerking tussen veiligheidsdepartemente te versterk, misdaadbrandpunte te stabiliseer en kriminele sindikate te ontwrig. Die regering sê Suid-Afrika word tans gekonfronteer met komplekse misdaadbedreigings, insluitend onwettige mynbou, bendegeweld, dwelmhandel en die verspreiding van onwettige vuurwapens.
Operasionele koördinering sal deur NatJoints bestuur word om samewerking tussen veiligheidsagentskappe en regeringsdepartemente te verseker. Die eerste fases van die ontplooiing het reeds in sommige dele van die land begin, met gesamentlike operasionele spanne wat reeds met geteikende optredes teen misdaad begin het.
