OOS-KAAP. – Wayne Petersen (47), ‘n Khoisan tradisionele leier wat ook as raadslid op die Kouga Plaaslike Munisipaliteit dien, is pas skuldig bevind op aanklagte van aanranding met die opset om ernstige liggaamlike leed te veroorsaak, asook op gewone aanranding.
Volgens NVG-woordvoerder, Luxolo Tyali, het die voorval op 29 Junie 2024 in Papiesfontein, binne die Sarah Baartman-distrik, plaasgevind toe Petersen twee klaers aangerand het. Die klaers was fietsryers wat deur ‘n openbare natuurreservaat in die Kouga-gebied gery het.
Getuienis voor die hof het getoon dat Petersen die fietsryers in ‘n swart BMW-SUV tegemoet gery en hulle van die pad af gedwing het. Hy het een se arm gegryp onder die voorwendsel van ‘n burgerlike inhegtenisneming en daarna ‘n knopkierie opgetel en die ander een daarmee gekonfronteer, wat geval het en beseer is. Petersen, wat homself verdedig het, het aangevoer dat hy geglo het die fietsryers het op grond van die Khoisan-gemeenskap ingedring en oor sy voorvaders se grafte gery.
Hy het die aanklagte ontken en beweer dat die saak aan ‘n grondgeskil gekoppel was. Die hof het sy weergawe verwerp en het bevind dat die staat sy saak bo redelike twyfel bewys het.
Volgens Tyali is die verhoor is gekenmerk deur die beskuldigde se ontwrigtende gedrag, wat herhaalde uitbarstings oor ras en ander irrelevante sake ingesluit het. Die hof het ook ‘n versoek om ‘n Khoisan-tolk van die hand gewys nadat vasgestel is dat Petersen die taal nie kan praat of verstaan nie.
Vonnis-oplegging is aanvanklik na 2 Junie uitgestel, nadat die beskuldigde aangedui het dat hy ‘n prokureur aangestel het. Die NVG het beklemtoon dat geen persoon, ongeag sy posisie of status, die wet in eie hande mag neem nie.
