MALMESBURY. – Telegram. Discord. Snapchat. Instagram.
Dit is apps wat miljoene kinders elke dag gebruik. Maar volgens die staat is dit ook platforms waardeur ’n 16-jarige seun van Malmesbury glo kontak gemaak het met Amerikaanse kinders tussen 11 en 17 jaar oud.
Die tiener word met die internasionale gewelddadige aanlyn netwerk bekend as “764” verbind.
Die saak behoort ’n ernstige waarskuwing aan ouers te wees: Weet jy met wie jou kind op sy of haar foon praat?
Hoe werk dit?
Volgens die FBI teiken 764-verwante netwerke kinders op sosialemedia-, boodskap- en speletjieplatforms.
Lede probeer eers die kind se vertroue wen en kan hulself as ’n vriend of romantiese belangstelling voordoen. Daarna kan hulle persoonlike inligting, foto’s of eksplisiete materiaal probeer bekom.
Sodra hulle iets kompromitterends het, kan dreigemente en afpersing begin.
Kinders is volgens die FBI al gedwing om seksuele dade uit te voer, hulself leed aan te doen, diere te beseer en beeldmateriaal daarvan te stuur.
Wat word in die Malmesbury-saak beweer?
Die 16-jarige word daarvan beskuldig dat hy 11 Amerikaanse kinders geteiken het.
Volgens berigte het die staat Telegram, Discord, Snapchat en Instagram genoem as platforms wat hy glo gebruik het om met kinders kontak te maak.
Hy het sommige kinders na bewering aangesê om seksuele dade op hulself uit te voer en dit te verfilm. Ander is glo aangesê om hulself leed aan te doen of hul troeteldiere te beseer of vermink.
Polisie sê elektroniese toestelle waarop beslag gelê is, het materiaal van seksuele misbruik van kinders en die verminking van diere bevat.
Die ondersoek het gevolg nadat intelligensie van die FBI, die Amerikaanse ambassade en die National Center for Missing & Exploited Children aan Suid-Afrikaanse owerhede verskaf is.
Ouers moet weet wat op kinders se fone gebeur
Die FBI waarsku ouers om te weet watter apps, speletjies en platforms hul kinders gebruik en met wie hulle daar kommunikeer.
Waarskuwingstekens kan skielike geheimhouding oor ’n foon, ’n onbekende nuwe aanlyn vriend, gedragsveranderinge, isolasie of onverklaarbare beserings insluit.
Die Malmesbury-saak wys hoe “vreemdelinggevaar” verander het. ’n Kind hoef nie meer die huis te verlaat om deur ’n vreemdeling geteiken te word nie. Die persoon kan duisende kilometers ver wees. En alles kan op ’n foon gebeur.
Die tiener se skuld of onskuld moet nog deur ’n hof bepaal word. Hy is minderjarig en mag nie geïdentifiseer word nie.
