SA Rugby het regstappe begin nadat ondersteuners glo sonder Springbokke All Blacks kaartjies vir Saterdag se toets by DHL-stadion in Kaapstad gelaat is. Die saak is reeds aan die organisasie se prokureurs oorhandig.
Volgens SA Rugby het sekere reisagentskappe kaartjies aan ondersteuners belowe wat hulle nie gehad het nie en ook nie kon bekom nie.
Agentskappe blameer glo SA Rugby
Die rugbybeheerliggaam sê van die agentskappe het daarna aan teleurgestelde kliënte beweer dat probleme aan SA Rugby se kant die rede was waarom hulle nie hul kaartjies ontvang het nie.
SA Rugby ontken dit ten sterkste.
“Dit is heeltemal onwaar,” lui ’n verklaring wat SA Rugby Saterdag uitgereik het.
Volgens SA Rugby het die betrokke agentskappe kaartjies verkoop sonder dat hulle ooit toegang tot kaartjies deur SA Rugby of sy amptelike kaartjie-agentskap gehad het.
Die verkope was volgens die rugbybeheerliggaam ook in stryd met die bepalings en voorwaardes vir kaartjieverkope vir die toets.
Saak aan prokureurs oorhandig
SA Rugby beskuldig die betrokke maatskappye daarvan dat hulle “onwettig en roekeloos” opgetree het in ’n poging om kommersiële voordeel te trek ten koste van hul kliënte.
Die organisasie het nou die aangeleentheid aan sy prokureurs oorhandig.
Tweede toets in Kaapstad
Die voorval kom op die dag van die tweede toets tussen die Springbokke en All Blacks in die Castle Double Malt Rugby’s Greatest Rivalry-reeks.
Die twee rugbyreuse pak mekaar Saterdagmiddag by DHL-stadion in Kaapstad. Lees ook: Kalmte voor die storm: Springbokke gereed om terug te slaan teen All Blacks en Kolbe en Feinberg-Mngomezulu begin teen All Blacks in Kaapstad.
Bron: SA Rugby Communications
