GAUTENG. – Die verhoor van ’n egpaar van Eldorado Park wat aangekla word in verband met die dood van hul 4-jarige dogter en die aanranding op hul 3-jarige seun, begin na verwagting op 20 Oktober in die hooggeregshof in Johannesburg.
Die pa staan onder meer tereg op aanklagte van moord, verkragting en kindermishandeling, terwyl die ma onder meer van moord en kindermishandeling aangekla word. Magaboke Mohlatlole, NVG-woordvoerder, sê die staat beweer die 4-jarige meisie is op 6 Augustus 2025 aangerand en seksueel misbruik terwyl haar ma by die werk was. Bure het na bewering die kind hoor skree en die polisie ontbied. Die meisie is bewusteloos met ernstige beserings aangetref en hospitaal toe geneem, waar sy later dood is. Die staat beweer ook die ma het beserings aan die kind opgemerk, maar dit nie by die toepaslike owerhede aangemeld nie.
Ook word die pa verder daarvan beskuldig dat hy die egpaar se 3-jarige seun op 13 Maart 2025 in ’n afsonderlike voorval aangerand het. Die ma staan ook tereg op ’n aanklag dat sy versuim het om seksuele misdrywe aan te meld. Die NVG sê hy is gereed om sy getuienis en saak tydens die verhoor aan die hof voor te lê, waar die aanklagte bewys moet word.
