WES-KAAP. – Nathan (14), ‘n junior lewensredder van die Milnerton Surf Lifesaving Club, het Sondag 4 Oktober gehelp om ’n jong vrou van verdrinking te red nadat hy haar in die moeilikheid in die branders by Milnerton-strand gewaar het.
Die vrou was sowat 75 m van die kus af in sterk branders toe Nathan, self op ‘n branderplank, sonder huiwering na haar geroei het. Die Milnerton Surf Lifesaving Club sê Nathan het in Junie vanjaar as junior lewensredder gekwalifiseer en moes nog sy eerste vrywillige diensbeurt voltooi. Hy het die vrou op sy branderplank gehelp om kop bo water te hou en haar gerusgestel dat ’n lewensredder binnekort by hulle sou wees. ’n Professionele lewensredder wat aan diens was, wat ook gesien het hoe die vrou verder see-in dryf, het na hulle geroei, haar oorgeneem en veilig op die strand besorg.
Die klub het Nathan se vinnige optrede geloof en gesê sy reaksie het moontlik verhoed dat die dag noodlottig geëindig het.
