Die verbrande liggaam van ’n vrou is Saterdag 17 Oktober in Tafelsig, Mitchells Plain, gevind, volgens ’n plasing deur Ian Cameron, voorsitter van die portefeuljekomitee oor polisie.
Volgens die aanvanklike inligting wat Cameron gedeel het, is ’n brandende vullisdrom naby die hoek van Hugenotestraat en AZ Berman-rylaan aangetref, met die vrou se liggaam daar naby. Haar identiteit is nog onbekend.
Cameron sê ’n moordondersoek is geopen. Die omstandighede van die vrou se dood is nog nie bekend nie.
Cameron vra deeglike ondersoek
Cameron het gesê die omstandighede is ontstellend en herinner hom aan die moord op Siphokazi Booi, ’n 27-jarige vrou wat in September 2021 in Mbekweni, Paarl, vermoor is.
Booi is deur haar kêrel, Sithobele Qebe, doodgeslaan. Hy het haar liggaam in ’n vullisdrom geplaas en probeer verbrand. Qebe is in Augustus 2024 tot lewenslange gevangenisstraf vir haar moord gevonnis.
Die verwysing na Booi se saak is Cameron se vergelyking met betrekking tot die wyse waarop die twee vroue se liggame gevind is. Daar is tans geen inligting wat daarop dui dat die twee sake met mekaar verband hou nie.
Cameron het gevra dat die nuwe saak deeglik ondersoek word, dat forensiese bewyse bewaar word en dat die vrou se identiteit vasgestel word. Hy sê diegene wat vir haar dood verantwoordelik is, moet opgespoor en voor die hof gebring word.
Hy het ook sy medelye met die vrou se naasbestaandes uitgespreek en gesê hulle verdien antwoorde en geregtigheid.
Bronne: Ian Cameron
