LOS ANGELES. – ’n Deeltydse akteur, Keith Lawrence Middlebrook (57), is tot meer as agt jaar tronkstraf gevonnis ná hy skuldig bevind is aan 11 aanklagte van bedrog. Middlebrook het beleggers oortuig om geld in sy maatskappye te belê deur valslik te beweer dat hy ‘n middel ontwikkel het wat COVID-19 kon genees en voorkom.
Tydens die verhoor het Middlebrook beweer dat die voormalige Lakers-basketbalspeler, Magic Johnson, as ‘n direkteur in sy onderneming gedien het. Johnson het egter tydens getuienis ontken dat hy Middlebrook ken of enige verband met sy maatskappye het. Die regter, Dale S. Fischer, het bevind dat Middlebrook doelbewus onder eed gelieg het oor sy verhouding met Johnson.
Middlebrook is in Maart 2020 deur die FBI in hegtenis geneem nadat hy vals pille aan ‘n geheime FBI-agent afgelewer het wat hom as ‘n belegger voorgedoen het. Volgens die aanklaers het hy voortgegaan om sy onskuld te beweer en geen berou getoon nie. Fischer het sy gebrek aan insig as kommerwekkend beskou en gesê dit verhoog die risiko dat hy soortgelyke misdade in die toekoms sal pleeg.
Middlebrook sal ook drie jaar onder toesig wees ná sy vrylating en ‘n boete van $25,000 betaal (ongeveer R467 000). Hy het egter volgehou dat hy “volledig onskuldig” is en beplan om teen die uitspraak te appelleer.
