VSA. – In die VSA word omtrent elke ding met ‘n nasionale dag gevier. So is vandag 17 Augustus National Thrift Shop Day, oftewel die Nasionale Dag vir Tweedehandse Winkels.
‘n Tweedehandse winkel (ook bekend as ‘n liefdadigheidswinkel, welsynswinkel, hospieswinkel, tweedehandse winkel, besendingswinkel of herverkoopwinkel) is ‘n kleinhandelonderneming wat goedere verkoop wat voorheen gebruik is, maar nog in ‘n goeie toestand is. Liefdadigheidsorganisasies bedryf gewoonlik hierdie winkels om geld in te samel vir die organisasie se verklaarde liefdadigheidsdoel. Die organisasie kan ook van die items gebruik om mense te help om ná ‘n ramp of tydens moeilike tye weer op hul voete te kom.
Die meeste items word deur die publiek geskenk, terwyl vrywilligers die winkels beman. Omdat die items geskenk is, word dit teen laer pryse aan kopers verkoop.
Almal wil geld spaar. Al hoe meer mense koop daarom by tweedehandse winkels. Klere, meubels en huishoudelike goedere is van die wonderlike vondste tussen al die ander verborge skatte wat in tweedehandse winkels regoor die land gevind kan word. Vir sommige mense gaan dit nie eens oor die prys wanneer hulle by ‘n tweedehandse winkel inkopies doen nie – dit is bloot ‘n bonus! Dit gaan eerder oor die avontuur om oorspronklike en antieke items op te spoor.
Hoewel inkopies by tweedehandse winkels jou begroting help, help dit ook die omgewing. Elke item wat by ‘n tweedehandse winkel gekoop word, is een item minder wat op ‘n stortingsterrein beland. Dit is herwinning op sy beste.
Bron: McAfee WebAdvisor, National Days Calender
