INTERNASIONAAL. – Die Australiese parlement in Canberra het op 28 November 2024 die wetgewende hervorming Online Safety Amendment (Social Media Minimum Age) Bill 2024 aangeneem. Vanaf 10 Desember sal kinders onder 16 jaar nie meer toegang hê tot of rekeninge mag hê op sekere sosialemediaplatforms nie.
Die wet raak platforms soos Facebook, Instagram, TikTok, Snapchat en X (voorheen Twitter), wat redelike stappe moet neem om te verseker dat geen gebruiker onder 16 ’n rekening het nie. Platforms wat nie aan die vereistes voldoen nie, kan boetes tot ongeveer R600 miljoen kry.
Die regering sê die maatreël is ontwerp om kinders te beskerm teen blootstelling aan skadelike inhoud, druk op liggaamsbeeld, sielkundige skade en aanlyn verslawing. Volgens eSafety Australia is die wet wêreldwyd baanbrekend, aangesien geen ander land ’n nasionale verbod ingestel het wat alle gebruikers onder 16 uitsluit nie.
Kinders kan steeds openbare inhoud op sosiale media sien sonder om aangemeld te wees, maar hulle kan nie plasings maak, kommentaar lewer of profiele hê nie. Sekere dienste soos onderrig- en gesondheidsplatforms val buite die verbod. Teenstanders argumenteer dat opleiding, ouerskap en regulering dalk beter is as ’n totale verbod en dat die wet privaatheid en kommunikasievryheid kan raak. ’n Regsgeding is tans deur tieners en ’n digitale vryheidsorganisasie geloods om die wet te probeer keer.
Bronne: loc.gov, esafety.gov.au, news.sky.com, abc.net.au, theguardian.com
