VRYSTAAT. – ’n Bejaarde man (78) is Maandag suksesvol van ’n bergkrans in die Mabolela-gebied naby QwaQwa gered nadat hy gegly, geval en die nag op ‘n rotsbank vasgekeer was.
Luidens ’n verklaring deur polisiewoordvoerder, lt.kol. Thabo Covane, het die man, Tumo Mahlangu, Maandagmiddag kort ná 16:00 die Phuthaditjhaba-gemeenskapsdienssentrum per selfoon gekontak om hulp te ontbied. ’n Gesamentlike reddingsoperasie, bestaande uit lede van die polisie, brandweer, nooddienste en ander reddingspesialiste, is van stapel gestuur. Die polisie se lugvleuel, honde-eenhede en paramedici het ook by die operasie aangesluit.
Mahlangu is veilig van die krans af gehys en op die toneel medies ondersoek voordat hy na die Mofumahadi Manapo Mopeli-streekshospitaal vervoer is. Hy het geen frakture opgedoen nie en is in ’n stabiele toestand verklaar. Volgens die polisie het Mahlangu gesê hy het ’n belangstelling in die natuur en het Maandag vir die eerste keer die berg uitgeklim.
Kol. Moeketsi Phiri, bevelvoerder van die polisie se lugvleuel, het die reddingspan geloof vir hul doeltreffende samewerking en die suksesvolle afloop van die operasie.
