Chris Steyn, oftewel Die Kontrak se Plakkies, met treffers soos Plaas Dorp Toe, Ek Kannie en Helemal op sy kerfstok, het ‘n splinternuwe enkelsnit, Bruinoog Blond, bekendgestel. Met diá liedjie wys Steyn ’n meer persoonlike kant van homself en vertel hy die storie van die vrou in sy lewe wat hom daagliks inspireer.
Fanie Nel van die Coleske Groep sê volgens Steyn beskryf die liedjie sy meisie presies soos sy is. “Bruinoog Blond gaan oor my meisie en dit verduidelik net mooi hoe sy is en hoe sy dinge doen,” sê hy. Die snit dien as ’n warm huldeblyk wat haar persoonlikheid, energie en invloed op sy lewe vasvang. Hoewel die liedjie steeds sy bekende styl en klank dra, is dit vir Steyn meer persoonlik as van sy vorige treffers. Hy glo dat mense wat ook ’n “bruinoog blond” in hul lewe het, die snit oor dieselfde rede gaan speel as hy.
Die liedjie is deur Georic Lomas en Marco van Deventer geskryf, wat onlangs met ‘n Aitsa vir Liedjieskrywer van die Jaar bekroon is. Steyn sê hy is baie tevrede met hoe hulle sy idee vertolk het. “Ek dink Georic en Marco het net presies vasgevang wie sy is en dit omskep in ’n liedjie wat eg en ongelooflik lekker is.”
Steyn wou Bruinoog Blond nou vrystel omdat dit ’n lekker, vrolike snit is waarby luisteraars maklik aanklank kan vind en sy wens daarmee is eenvoudig. “Ek hoop mense kan hulself daarin sien en dit sommer net geniet.”
Alhoewel daar nie ’n volledige musiekvideo beplan word nie, is ’n liriekvideo reeds op pad en sal dit binnekort op YouTube beskikbaar wees.
Bruinoog Blond is hier op alle groot digitale stroomplatforms beskikbaar, insluitend Apple Music, Spotify en Deezer.
