DENEMARKE. – Minstens 17 mense is beseer, van wie vier in ’n kritieke toestand verkeer, nadat twee plaaslike treine reg van voor teen mekaar in Denemarke gebots het.
Volgens The Guardian het die openbare uitsaaier DR beelde uitgesaai van twee treine met beskadigde voorkante wat teenoor mekaar in ’n beboste gebied tot stilstand gekom het.
Die voorval het Donderdag noord van Kopenhagen plaasgevind op ’n spoorlyn wat die dorpe Hillerød en Kagerup verbind, het die polisie in ’n verklaring gesê. “Dit is twee plaaslike treine wat reg van voor teen mekaar gebots het,” het ’n woordvoerder van die reddingsdienste gesê.
“Daar is beserings onder die passasiers. Almal is uit die treine, dus is niemand vasgekeer nie … Groot hulpbronne is na die toneel ontplooi,” het die woordvoerder bygevoeg.
Die brandweer het intussen op X bevestig die beseerdes is per ambulans en helikopter na hospitale vervoer.
Bronne: The Guardian, Roya News
