Deur Jhandré Bredenkamp
SUID-AFRIKA. Op 39, en net meer as ’n maand voor sy 40ste verjaardag, is Deon Fourie terug in die Springbokgroep vir een van die grootste uitdagings in wêreldrugby: ’n vier-toetsreeks teen die All Blacks.
Rassie Erasmus het die veteraanvoorspeler dié week by die Bokgroep ingeroep vir die Rugby’s Greatest Rivalry-reeks nadat Fourie ná ’n lang tydperk langs die kantlyn weens ’n besering weer sy terugkeer tot topvlakrugby gemaak het.
Fourie, wat op 25 September 40 word, bied Erasmus waardevolle veelsydigheid omdat hy sowel haker as losvoorspeler kan speel.
Daar is ook ’n besondere sirkel aan sy terugkeer.
Fourie se laaste toets vir Suid-Afrika was die 2023 Rugbywêreldbeker-eindstryd teen die All Blacks in Parys. In dié eindstryd moes hy vir die grootste deel van die wedstryd op haker diens doen nadat Bongi Mbonambi vroeg beseer is.
Nou, byna drie jaar later, is dit weer die All Blacks wat op hom wag.
Hy het Vrydagaand in die Stormers se wedstryd teen Nieu-Seeland in Kaapstad sy terugkeer tot topvlakrugby gemaak, waarna Erasmus hom by die Bokgroep ingeroep het.
SA Rugby sê Fourie se ervaring sal van groot waarde wees vir die Bokke se voorspelersgroep in die historiese reeks wat op Saterdag 22 Augustus op Ellispark in Johannesburg begin.
Die spanne ontmoet daarna op 29 Augustus in die DHL-stadion in Kaapstad, op 5 September in die FNB-stadion in Johannesburg en op 12 September in Baltimore in die VSA.
En Fourie is nie die enigste veteraan wat dié week gewys het ouderdom het in rugby nie noodwendig die finale sê nie.
Dinsdagaand het die 44-jarige Ma’a Nonu vir die Sharks teen die All Blacks op Kings Park uitgedraf.
Nonu het 103 toetse vir Nieu-Seeland gespeel en was deel van die All Blacks-spanne wat die Wêreldbeker in 2011 en 2015 gewen het.
Die besondere oomblik het reeds voor afskop gekom toe Nonu, nadat die All Blacks hulle haka uitgevoer het, alleen vorentoe getree en met ’n haka geantwoord het.
Nonu op 44. Fourie op 39 en op pad na 40.
In ’n sport waar daar voortdurend na die volgende jong ster gesoek word, het dié twee veterane dieselfde boodskap gestuur: as jy goed genoeg is, is jou geboortedatum net ’n syfer.
Bronne: SA Rugby; SuperSport; 1News New Zealand.
