NIEU-SEELAND. – ’n James Bond-geïnspireerde Fabergé-hangertjie is ná ses dae teruggekry, nadat die vermeende dief dit in ’n juwelierswinkel in Auckland ingesluk het. Die hangertjie is uit 18 karaat geelgoud vervaardig, met groen emalje-detail en kos sowat NZ$33 000, oftewel ongeveer R 400 000.
Volgens die polisie het die 32-jarige man op 28 November die beperkte-uitgawe Fabergé-eierhangertjie ingesluk, nadat personeel by Partridge Jewellers hom van diefstal verdink het. Hy is kort daarna in die winkel in hegtenis geneem. Polisie en mediese personeel het die man voortdurend dopgehou totdat die juweel Donderdagaand natuurlik deur sy spysverteringstelsel beweeg en uitgeskei is. Geen mediese ingryping was nodig nie. Die hangertjie is onbeskadig teruggevind en dien nou as bewysstuk.
Die egte Fabergé-item is ’n beperkte uitgawe wat geïnspireer is deur die 1983-James Bond-film Octopussy. Nadat die hangertjie uitgeskei is, het polisiefoto’s gewys dat selfs die oorspronklike pryskaartjie nog daaraan geheg was.
Die beskuldigde bly in aanhouding en sal op 8 Desember in die Auckland-distrikshof verskyn.
Bronne: AP News, The Guardian, South China Morning Post
Foto: New Zealand Police / AFP (Associated Press)
