Sarah’s Trust, die internasionale liefdadigheidsorganisasie wat deur Sarah Ferguson, die eksvrou van Andrew Mountbatten-Windsor en voormalige hertogin, op die been gebring is, sal vir eers sluit ná “maande van beraadslaging”.
Die organisasie het met sowat 60 ander organisasies saamgewerk om opvoeding, gesondheidsorg, krisisbestuur en omgewingsprojekte na meer as 20 lande te neem.
The Guardian berig dit volg op die bekendmaking van sowat 3 miljoen lêers met besonderhede oor wyle Epstein se verbintenis met ryk en invloedryke persone Die lêers bevat e-posse tussen Sarah Ferguson en Epstein, die meeste daarvan ná 2008 gestuur, nadat Epstein skuldig bevind is aan die seksuele misbruik van minderjarige meisies.
In 2009 sê Ferguson in ‘n e-pos aan Epstein dat hy die broer is waarvoor sy altyd gehoop het. In 2011 word hy met ‘n babaseun se geboorte gelukgewens en sy beskuldig hom dan daarvan dat hy net vriende met haar was “… om Andrew by te kom”.
Koning Charles het die voormalige Hertog van York verlede jaar van sy titels gestroop ná die nadoodse publikasie van ‘n boek deur Virginia Giuffre, waarin sy verklaar het dat sy op 17 deur Epstein en sy voormalige meisie, Ghislaine Maxwell, vir seks verhandel is.
Bronne: The Guardian, InDaily.
