GAUTENG. – Die provinsiale regering het gekoördineerde ingrypings verskerp om die volgehoue waterprobleme in dele van Johannesburg, Ekurhuleni, Tshwane en Mogale City aan te spreek. ’n Operasionele sentrum is onder leiding van die LUR, Jacob Mamabolo, gevestig om dringende ingrypings te prioritiseer.
Volgens ‘n verklaring wat Vrydag uitgereik is, word die waterprobleme veroorsaak deur verouderde infrastruktuur, hoë aanvraag, lekkasies, kragonderbrekings wat pompvermoë raak en instandhoudingsagterstande. Die provinsie werk saam met die departement van water en sanitasie, COGTA, Rand Water en munisipaliteite om watertoevoer te stabiliseer en stelselweerbaarheid te verbeter. Die minister, Pemmy Majodina, adjunkminister David Mahlobo en COGTA-minister Velenkosini Hlabisa is betrokke by toesig en koördinering.
Belangrike maatreëls sluit die versnelde herstel van lekkasies, opknapping van pompstasies en reservoirs, vervanging van verouderde pyplyne, drukbestuur in hoëverbruiksgebiede, tegniese ondersteuning aan munisipaliteite en die herprioritisering van infrastruktuurbegrotings in.
Die provinsie erken dat langtermynoplossings, insluitend infrastruktuurvernuwing en beter munisipale kapasiteit, noodsaaklik is om herhalende waterprobleme finaal op te los. Inwoners word intussen aangemoedig om water spaarsaam te gebruik terwyl ingrypings voortgaan.
Lees die volledige verklaring hier onder.
