VSA. – Kapt. Spencer Long, ‘n brandweerkaptein, sy vrou Katrina en hul drie seuns, Reid, Thayne en Gage, is dood nadat hulle in die Amerikaanse deelstaat Utah deur ‘n kitsvloed meegesleur is terwyl hulle op ‘n stap-en-kampeeruitstappie was. Die seuns was onderskeidelik 21, 13 en 12 jaar oud.
Kapt. Long was van die Provo Fire & Rescue-dienste. Die gesin het Vrydag die Sunglow-kampeerterrein naby Bicknell in Wayne County besoek toe swaar reën skielike oorstromings in die canyon veroorsaak het. Volgens die Wayne County-balju se kantoor is die gesin waarskynlik deur die vinnig stygende vloedwater meegesleur. Nooddienste is Vrydagaand ontbied nadat die liggaam van ‘n jong seun in die vloedwater gevind is. Tydens die daaropvolgende soektog is nog twee liggame opgespoor, terwyl die oorblywende twee slagoffers Saterdag gevind is.
Die gesin se dogter, Lydia (23), het oorleef omdat sy nie saam met hulle op die uitstappie was nie. Provo Fire & Rescue het in ‘n verklaring gesê hulle is diep bedroef oor die verlies van kapt. Long en sy gesin en het hul medelye met familie, vriende en kollegas uitgespreek.
Die tragedie het groot meegevoel in Utah ontlok, met brandweerpersoneel van verskeie departemente wat die gesin tydens ‘n roudiens en prosessie geëer het. ‘n Aanlyn fonds is intussen geskep om Lydia te ondersteun.
Wendi Long, die ma van kapt. Long, sê die familie is verpletter deur die skielike en tragiese dood van Spencer, Katrina en hul seuns. Sy het gesê hul dogter, Lydia, het nou die liefde en ondersteuning van familie en die gemeenskap nodig. Volgens haar wil die familie dit duidelik stel dat Spencer nooit sy gesin doelbewus aan gevaar sou blootstel nie.
Sy beskryf Spencer as veel meer as net haar oudste seun. As die oudste van vier broers was hy volgens haar ‘n voorbeeld van harde werk, wysheid en stille leierskap. Hy het as kaptein by Provo Fire & Rescue gedien en oor jare se ervaring as veldbrandbestryder, paramedikus en lid van soek-en-reddingspanne beskik. Hy het sy lewe daaraan gewy om ander te dien, te beskerm en op te lei.
Volgens Wendi was Spencer lief vir die buitelewe en het hy elke geleentheid aangegryp om saam met sy gesin nuwe avonture te beleef. Katrina, het sy gesê, was die hart van hul huisgesin – ‘n toegewyde en deernisvolle vrou wat ook medestigter van Summit Medical Spa was, waar sy gehelp het om ‘n kultuur van sorg en gemeenskap te vestig. Saam het hulle hul kinders met sterk waardes grootgemaak.
Wendi sê elkeen van die drie seuns het op sy eie manier uitgeblink. Reid was diep toegewyd aan sy geloof. Thayne was ‘n talentvolle hokkiedoelwagter, het onlangs begin boks en het reeds op 13-jarige ouderdom sy eie motorversorgingsonderneming begin. Gage het ‘n passie vir hokkie en die natuur gehad en ondanks diabetes, altyd positief gebly en ander met sy glimlag geïnspireer.
Sy sê die verlies van die vyf gesinslede laat ‘n leemte wat nooit gevul sal kan word nie. Die familie sal hulle onthou vir hul diens aan ander, hul geloof, harde werk, liefde vir die natuur en die kosbare herinneringe wat hulle saam geskep het.
Wendi het ook haar opregte dank uitgespreek teenoor almal wat hul ondersteuning betoon het. Sy het bevestig dat ‘n GoFundMe-veldtog op die been gebring is om Lydia in hierdie moeilike tyd by te staan en het mense gevra om die familie in hul gebede te hou.
“Ons sal Spencer, Katrina, Reid, Thayne en Gage vir altyd liefhê en mis. Hul gees en nalatenskap sal altyd in ons harte voortleef,” het sy gesê.
Bronne: Wendi Long, Associated Press, CBS News, KSL News, Daily Herald en Wayne County Sheriff’s Office
