KWAZULU-NATAL. – Thulani Gcaleka het Donderdag uit die Sevontein Korrektiewe Sentrum ontsnap. Hy is ‘n lewenslange vonnis vir onder meer poging tot moord, poging tot verkragting, verkragting, roof en inbraak opgelê.
Singabakho Nxumalo, woordvoerder van die departement van korrektiewe dienste, sê die departement het ‘n interne ondersoek van stapel gestuur. Die moontlike skorsing van ‘n amptenaar word in verband met die voorval oorweeg. Volgens voorlopige inligting was Gcaleka deel van ’n werkspan wat op die tronkplaas werksaam was toe hy ontsnap het. Die departement ondersoek nou die omstandighede van die voorval en het aangedui dat enige sekuriteitsbreuk of afwyking van prosedures streng hanteer sal word. Watter dissiplinêre stappe ingestel gaan word, sal deur die uitslag van die ondersoek bepaal word.
Die inhegtenisneming van Gcaleka bly ’n prioriteit. Lede van die publiek wat hom opmerk of inligting oor sy verblyfplek het, word versoek om dit onmiddellik by die naaste polisiekantoor of korrektiewe fasiliteit aan te meld.
