KWAZULU-NATAL. – ’n Babameisie, na raming sowat een maand oud, is Dinsdagmiddag in ’n kritieke toestand gered nadat ’n motoris ’n verdagte situasie tussen die Old Ottawa-hoofpad en Woodview-rylaan aangemeld het.
KZN VIP Protection Services is na die toneel waar met hul aankoms vasgestel is dat ’n hawelose persoon die baba naby ’n stroom in die gebied gevind het. Die kind was saam met ’n sak klere agtergelaat. Volgens die nooddiensverslag het die baba tekens van ernstige ontwatering getoon en is sy vir ’n geruime tyd aan die elemente blootgestel. Mediese bystand is ontbied en paramedici het haar op die toneel gestabiliseer voordat sy na ’n hospitaal vir verdere behandeling vervoer is. Voor haar vervoer is die baba versorg en warm aangetrek.
Die Suid-Afrikaanse Polisiediens is van die voorval in kennis gestel en ’n ondersoek is van stapel gestuur.
Die publiek is bedank vir hul vinnige optrede, wat waarskynlik ’n deurslaggewende rol gespeel het om die baba se lewe te red.
