UTAH, VSA. – Die Amerikaanse hof het nog nie beslis of Tyler Robinson, wat van die moord op die konserwatiewe politieke aktivis Charlie Kirk aangekla word, verhoor sal word nie. Ná vyf dae se getuienis het regter Tony Graf aangekondig dat slotbetoë eers op 1 September aangehoor sal word voordat hy besluit of daar voldoende bewyse is om die saak na ‘n volledige moordverhoor te verwys.
Aanklaers het tydens die voorlopige verhoor aangevoer dat forensiese DNS-bewyse Robinson met die beweerde moordwapen verbind. Volgens ‘n forensiese deskundige is die DNS-profiel op die geweer en ammunisie oorweldigend waarskynlik dié van Robinson. Die staat het ook toesigkamera-opnames aan die hof vertoon wat die beskuldigde glo naby die toneel voor en ná die skietvoorval wys.
Die verdediging het egter die betroubaarheid van die DNS- en ander forensiese bewyse bevraagteken en aangevoer dat die staat nog nie voldoende bewys gelewer het om Robinson aan die moord te verbind nie.
Charlie Kirk se weduwee, Erika Kirk, het die verrigtinge bygewoon en saam met familielede ongeredigeerde videomateriaal van die skietvoorval gesien. Ná afloop van die verhoor het die familie gesê hulle waardeer die openbare steun en bly daartoe verbind om geregtigheid te laat geskied.
Robinson staan tereg op ‘n aanklag van verswarende moord en verwante aanklagte nadat Kirk op 10 September 2025 tydens ‘n openbare geleentheid by die Utah Valley-universiteit doodgeskiet is. Aanklaers het aangedui dat hulle die doodstraf sal nastreef indien die saak tot ‘n volledige verhoor oorgaan.
Bronne: Associated Press, The Guardian, PBS NewsHour
