Met die somer hier en temperature wat styg, waarsku nood- en veiligheidsorganisasies ouers en versorgers teen die gevare van kinders en hitte in voertuie. Self ’n paar minute wat ‘n kind alleen in ‘n voertuig gelaat word, kan fataal wees. Volgens internasionale data is meer as 1 010 kinders wêreldwyd oor die afgelope 25 jaar oorlede aan hitteberoerte nadat hulle in warm motors agtergelaat is.
Onlangse voorvalle van kinders wat in motors oorlede is, sluit ’n 3-jarige meisie by Seshego (Oktober 2025) en drie kinders in Bolebedu (Januarie 2024) in, wat oorlede is nadat hulle in motors toegesluit was. Volgens ER24 en ChildSafe styg die temperatuur binne ’n motor vinnig. Selfs op matige dae kan ‘n kind se liggaamstemperatuur drie tot vyf keer vinniger as dié van volwassenes oorverhit.
Die temperatuur in ‘n motor kan binne enkele minute met 10 -15 °C styg. ‘n Motor wat in die son geparkeer is met ’n buitetemperatuur van ongeveer 24 °C, kan binne 10 minute binne minstens 10 °C warmer word en binne 30 minute kan die binnetemperatuur tot 50 °C styg. Hitteberoerte kan opgedoen word – met kinders wat meer vatbaar is as volwassenes. Kinders kan nie maklik uit ’n motor kom as hulle vas is nie, veral nie as ‘n kinderslot gestel is, of ‘n kind in ‘n stoeltjie vasgegespe is nie. Selfs ’n paar minute kan tot bewusteloosheid en breinskade lei. Gesluite motors beperk lugvloei. Ouers en versorgers word gemaan om voorsorgmaatreëls toe te pas om kinders te beskerm.
- Moenie kinders ooit alleen in ‘n motor laat nie, selfs nie vir ’n kort rukkie nie.
- Maak dit ’n gewoonte om altyd te kyk dat niemand op die agtersitplek vergeet is nie, voordat jy die motor toesluit.
- Parkeer in die skaduwee en vermy lang periodes van direkte sonlig op die voertuig.
- Wees bewus van weerwaarskuwings oor warm weer en pas roetes of tyd van vervoer aan.
- Leer kinders, indien oud genoeg, om te waarsku as hulle in gevaar is.
- As jy ’n kind alleen in ’n motor sien, bel onmiddellik nooddienste.
Die voorbeelde hier bo wys hoe vinnig ’n gewone situasie kan in ’n tragedie kan verander. Deur konsekwent voorsorgmaatreëls te tref, kan ouers en versorgers voorkom dat kinders aan hitteberoerte blootgestel word.
Bronne: TimesLive, TimesLive, ER24, ChildSafe, NHTSA, MotorHappy,
