LIMPOPO. – Reuben Marsberg (22) het sedert Woensdag spoorloos verdwyn. Die Levubu-polisie het ‘n soektog na hom van stapel gestuur.
Volgens polisiewoordvoerder, sers. Mienkie Ramakgoakgoa, het Marsberg se broer aangedui dat Reuben hom omstreeks 17:30 by sy vriendin afgelaai het, met die plan om hom die volgende oggend weer op te laai. Toe hy sy broer Donderdagoggend omstreeks 08:00 probeer bel, was Reuben se selfoon afgeskakel.
Sy broer is daarna na hulle woning op plaas A9.1 langs die R524 in Levubu. Daar het hy opgemerk dat Reuben se room-en-wit Toyota Land Cruiser (registrasie BV35 JTZN) nie by die huis was nie. Die huis was nie gesluit nie en binne het hy ’n televisie, komberse, ’n matras en ’n PlayStation uit sy broer se kamer vermis gevind. Daar was geen tekens van geforseerde toegang nie en volgens die polisie lyk niks op die toneel verdag nie.
“Polisie-ondersoeke duur voort om die omstandighede oor sy verdwyning vas te stel,” sê sers. Ramakgoakgoa.
Enigiemand met inligting oor Marsberg se moontlike ligging word gevra om speur.sers. Manari Mashudu by 082 319 9622 te bel.
