ITALIë. – Italië se hoogste hof (die hof van kassasie) het onlangs beslis dat Italiaanse restaurante en hotelle nie wetlik verplig is om kraanwater aan klante te bedien nie. Ondernemings het volle diskresie om kraanwater te weier en slegs gebottelde mineraalwater teen betaling aan te bied.
’n Toeris wat by die vyfsterhotel Hotel Sassongher in die Dolomiete-bergoord Corvara gebly het, is tydens ete acqua corrente geweier en moes eerder €7 per bottel vir mineraalwater betaal.
Die gas het daarna skadevergoeding van €2 700 geëis en aangevoer dat water ’n universele mensereg is en dat restaurante nie ’n basiese, gratis noodsaaklike diens behoort te weier nie.
Die Hoogste Hof het egter die eis van die hand gewys en vroeëre beslissings van laer howe bekragtig. Daarmee is bevestig dat daar geen grondwetlike of statutêre vereiste in Italië bestaan wat gasvryheidsinstellings verplig om kraanwater aan gaste te bedien nie.
Reëls verskil van land tot land. Frankryk en Spanje vereis wetlik dat restaurante gratis drinkwater aan klante moet voorsien, terwyl Duitsland en Italië geen sodanige verpligting het nie.
Bronne: The Guardian, TravelPirates
